Duoblulo de Kim Jong Un estis forpelita el Vjetnamlando

Laŭ raporto sur la retejo de la franca radiostacio RFI, hodiaŭ (la 25-an) la vjetnama registaro forpelis tiun duoblulon pri Kim Jong Un, nome Howard X. Li estas aŭstraliano loĝanta en Honkongo (Ĉinlando) kaj intervjue en hotelo li asertis, ke al la vjetnama registaro "ŝercemo mankas", rifuzante la kialon "nevalida vizo" kiel pravigo al sia forpelo.

"Howard X" kaj la kanadano "Russell White" - tiu duoblulo pri Donald Trump - pasintvendrede (la 23-an) ĉe la urbocento de Hanojo scenigis sian propran kunvenon pri la atomkerna senarmigado de Nord-Korelando. Ili sin kisis ĉe la akceptejo de la hotelo "La Paix" en la vjetnama regurbo.

La duoblulo pri Trump ne estis devigita lasi la landon, tamen li estis malpermesita fari publikajn aperojn rolante kiel "usona ŝtatprezidanto".

La veraj Kim Jong Un kaj Donald Trump kunveniĝos tie en la venontaj ĵaŭdo (la 28-an) kaj vendredo (la 1-an).