La bildsimbola konstruaĵo Chrysler estas anoncata por vendo

La konstruaĵo Chrysler (angle Chrysler Building) - tiu ĉefverko de la arĥitekturo artdekora (france Art Déco) kaj elstara simbolo de la usona urbo Nov-Jorko - estas anoncata por vendo, laŭ informis iu kunproprulo de la konstruaĵo kaj iu makleristo kontraktata por peri la vendon.

Tiu 77-etaĝa ĉielskrapanto por oficejoj situas en la orienta parto de Manhatano, en la numero 405 de la Avenuo Lexington kaj en la vojkruciĝo de la Strato 42. Estante 319 metroj alta, ĝi estis la plej alta konstruaĵo de la mondo dum dek unu monatoj, ĝis la konstruado de la "Empire State Building" en 1931. La konstruaĵo Chrysler estis dizajnita de William Van Alen, kaj poste vendita al Walter Percy Chrysler por lokigado de la ĉefsidejo por ties kompanio. Ĝi estis finpretigita en 1930 kaj renovigita en 1978 kaj 1979.

Nuntempe ĝi estas kunpropraĵo de la suverena fonduso Konsilantaro pri Investoj de Abudabio (90%) kaj de la konstruiganto Tishman Speyer Properties (10%).