Oni savis hundidon kun kroma “vosto” sur la frunto

10-semajna hundido enhavanta “voston” meze de la frunto estis savita de “Mac’s Mission”, kiu estas centro pri bestoprotektado en la usona subŝtato Misurio.

La eta hundo estis nomata “Narwhal”, alude al tiu baleno de la speco narvalo, kiu ŝajnas posedi ununuran longan kornon en la kapo, tamen vere temas pri dentego.

Rochelle Steffen, kiu mastrumas la Mac’s Mission raportis al BBC, ke la eta Narwhal lastmarde (la 12-an) vizitis la bestokuraciston, kaj ikso-radia bildo montris, ke la vosto havas nek ostojn nek ligon al ajna organo. Pro tio, ke la vosteto ne kaŭzas doloron al la ido, ne estas bezono forigi ĝin pro kuraca kialo. Ĝiaj bildoj kaj filmetoj sur la fejsbukpaĝo de la centro estis multege vidataj.

Steffen asertis, ke Narwhal estas unu inter tiuj centoj da hundoj forlasitaj ĉe la kamparaj regionoj de Misurio.